वाळपई: वाळपई येथील मोईन शेख याला पोलिस कोठडीत कथित मारहाणीचा सीसीटीव्ही व्हिडिओ समोर आल्याने खळबळ उडाली असून प्रकरणी उपनिरीक्षक प्रथमेश गावस यांची राखीव दलात बदली करण्यात आली आहे.

वाळपईचे पोलिस निरीक्षक विदेश शिरोडकर यांनी कुटुंबीयांना याबाबत माहिती देत पुढील कारवाई प्रलंबित असल्याचे सांगितले. या प्रकरणात उपनिरीक्षक प्रथमेश गावस यांच्यासह एका एएसआय व चार पोलिस कर्मचाऱ्यांकडून मोईनवर मारहाण झाल्याचा आरोप कुटुंबीयांनी केला आहे. या पार्श्वभूमीवर वाळपई पोलिस स्थानकात तणावपूर्ण वातावरण निर्माण झाले आहे.

कुटुंबीयांच्या सातत्यपूर्ण मागणीनंतर पोलिस स्थानकातील सीसीटीव्ही फुटेज तपासण्यात आले. पोलिस अधिक्षक विश्वेश कर्पे यांच्या उपस्थितीत पाहण्यात आलेल्या या फुटेजमध्ये पाच जण मोईन शेखला मारहाण करत असल्याचे दिसून आल्याचा दावा करण्यात आला आहे.

विश्वजीत राणेंचे डीजीपींना पत्र

या प्रकरणात आरोग्यमंत्री विश्वजीत राणे यांनी पोलिस महासंचालक आलोक कुमार यांना ई-मेलद्वारे पत्र पाठवले असून मोईन शेख मृत्यू प्रकरणाची पुनर्तपासणी करण्याची मागणी केली आहे. पत्रात संपूर्ण प्रकरणाची स्वतंत्र, निष्पक्ष व पारदर्शक चौकशी होणे अत्यावश्यक असल्याचे राणे यांनी अधोरेखित केले आहे.

कारवाईची मागणी

आज सकाळपासून मोईन शेख यांचे कुटुंबीय व स्थानिक नागरिक वाळपई पोलिस स्थानकात ठिय्या आंदोलन करत असून उपनिरीक्षक प्रथमेश गावस व संबंधित चार पोलिस कर्मचाऱ्यांना तत्काळ अटक व निलंबनाची मागणी करीत आहेत. मोठ्या संख्येने नागरिक जमल्याने पोलिस स्थानक परिसरात तणाव वाढला आहे. पोलिस उपअधिक्षक विश्वेश कर्पे यांनी या प्रकरणात योग्य ती कायदेशीर कारवाई केली जाईल, असे सांगितले.