पणजी: कोरोना विरोधात लढण्यासाठी 15 ते 18 वयोगटातील 74 हजार विद्यार्थ्यांच्या लसीकरणाचा टप्पा पूर्ण होत असतानाच आता 12 ते 14 वयोगटातील मुलांना भारतीय बनावटीची कार्बोक्स लस राज्यात आजपासून देण्यात येणार आहे. त्यासाठी आरोग्य खात्याने सर्व तयारी केली असून हे लसीकरण प्रामुख्याने शाळांमध्ये दिले जाणार आहे, अशी माहिती राज्याचे लसीकरण प्रमुख डॉ. राजेंद्र बोरकर यांनी दिली आहे.

राज्यात 18 वर्षांवरील नागरिकांना कोरोना प्रतिबंधक लसीचे दोन्ही डोस देण्याचे उद्दिष्ट 100 टक्के पूर्ण झाले असून 26,37,399 डोस देण्यात आले आहेत, तर 15 ते 18 वयोगटातील 74 हजार विद्यार्थ्यांचे लक्ष्य ठेवून या वयोगटातील विद्यार्थ्यांना लस देणे सुरू ठेवले आहे. यातील 89 टक्के विद्यार्थ्यांना पहिला डोस दिला असून 75 टक्के मुलांनी दुसरा डोसही घेतला आहे. आता 12 ते 14 वयोगटातील मुलांना ही लस देण्यात येणार असून याचा प्रारंभ आजपासून होत आहे.