मडगाव: ‘उटा’च्या प्रेरणा यात्रेत बाळ्ळी जळीत कांडातील हुतात्मा मंगेश गावकर आणि दिलीप वेळीप यांचे पुतळे होते. हे, पुतळे वापरण्याची परवानगी कुटुंबीयांपैकी कुणाकडून घेतली का, असा सवाल कै.मंगेश गावकर यांच्या कुटुंबीयांनी उटा नेत्यांना केल्याने प्रेरणा यात्राच वादात सापडली आहे.

नोव्हेंबरच्या दुसऱ्या आठवड्यात फर्मागुढी येथे होणाऱ्या ‘उटा’च्या द्विदशकपूर्ती सोहळ्याच्या जनजागृतीसाठी दहा दिवसीय अखंड प्रेरणायात्रेचे आयोजन केले आहे. या यात्रेची सुरवात परवा (२७ रोजी) गावडोंगरीतून मंत्री गोविंद गावडे यांनी बावटा दाखवून केली होती.

या यात्रेच्या उदघाटनाच्या काही क्षणापूर्वी, कुटुंबीयांकडून सर्वांसमोर ही विचारणा झाल्याने, ‘उटा’चे पदाधिकारी मृत मंगेशाच्या कुटुंबीयांना गृहीत धरतात का, असा प्रश्न उपस्थित झाला आहे. याविषयी गावकर कुटुंबीयाशी संपर्क साधला असता, तूर्त आम्हाला काय सांगयचे होते ते आम्ही ‘उटा’वाल्यांना सांगितले आहे. आता आम्ही याविषयी अधिक बोलू इच्छित नाही, पण योग्यवेळी नक्कीच पत्रकार परिषद घेऊन आमच्या दुखावलेल्या भावना जनतेसमोर मांडू, असे त्यांनी सांगितले.

मंत्री गावडेंचे मौन

तेथे आलेल्या गावकर कुटुंबीयांनी सर्वप्रथम ‘उटा’चे कार्यकारी अध्यक्ष विश्वास गावडे यांना जाब विचारला, तर त्यांनी त्यांना, जे काही विचारायचे आहे ते अध्यक्ष प्रकाश वेळीप यांना विचारा असे सांगितले. ते प्रकाश वेळीप यांच्याकडे गेले. तसे त्यांनी थातुर मातूर उत्तरे देत, यावर नंतर बोलूया, असे सांगून वेळ मारून नेली. हा अगदी संवेदनशील मुद्दा समोर येऊनही तेथे उपस्थित मंत्री गावडे त्यांचाशी काहीच का बोलले नाहीत, याबद्दल आश्चर्य व्यक्त करण्यात येत आहे.