Electric Bus : पणजी, कदंब महामंडळाला सध्या २०० इलेक्ट्रिक बसगाड्यांचा तुटवडा भासत आहे. स्मार्ट सिटी प्रकल्पांतर्गत कदंबला ४८ पैकी ३२ इलेक्ट्रिक बसगाड्या मिळाल्या आहेत, असे कदंब महामंडळाचे अध्यक्ष उल्हास तुयेकर यांनी सांगितले.

कदंब परिवहन महामंडळाच्या ताफ्यात मंगळवारी दोन इलेक्ट्रिक बसगाड्या दाखल झाल्या. पणजी स्मार्ट सिटी प्रकल्पांतर्गत या बसगाड्या मिळाल्या असून या दोन्ही बसगाड्या पणजी बसस्थानक ते गोवा विद्यापीठ मार्गे बांबोळी रुग्णालय अशी सेवा देणार आहेत.

तुयेकर यांच्या हस्ते या दोन इलेक्ट्रिक बसगाड्यांना हिरवा झेंडा दाखवण्यात आला.

उल्हास तुयेकर यांनी यावेळी सांगितले की, १५ डिसेंबरपर्यंत स्मार्ट सिटी प्रकल्पांतर्गत पणजीत आणखी काही इलेक्ट्रिक बसगाड्या धावणार आहेत. कदंब महामंडळाकडे २०० इलेक्ट्रिक बसगाड्यांची कमतरता आहे.

पणजी स्मार्ट सिटी प्रकल्पांतर्गत ४८ इलेक्ट्रिक बसगाड्या दाखल होणार असून आतापर्यंत फक्त ३२ इलेक्ट्रिक बसगाड्या मिळाल्या आहेत. मद्यपी चालकांबाबत तुयेकर म्हणाले की, कदंबचे टीसी अधिकारी संशयित वाहनचालकांची अल्कोमीटर चाचणी करतील. मद्यधुंद अवस्थेत आढळल्यास त्याचे समुपदेशन केले जाईल. यावेळी उपाध्यक्ष क्रितेश नाईक गावकर, महाव्यवस्थापक संजय घाटे आणि इतर अधिकारी उपस्थित होते.

चार्जिंग स्टेशन उभारणार

स्मार्ट सिटी प्रकल्पांतर्गत सुरू असलेल्या रस्त्यांच्या कामांमुळे पणजी शहरात इलेक्ट्रिक बसगाड्या सुरू करण्यास उशीर झाल्याचे तुयेकर यांनी सांगितले.

या बसगाड्यांची वेळ आणि मार्ग लवकरच ठरवले जातील. चार्जिंग स्टेशनचे कामही लवकरच सुरू होणार आहे. मडगाव, पर्वरी आणि इतर ठिकाणी चार्जिंग स्टेशन उभारली आहेत.