Benaulim Beach: बाणावली समुद्र किनार्‍यावर फिरायला आलेल्‍या युवाॅन मॉरिस या 79 वर्षीय ब्रिटीश महिलेला एका उधळलेल्‍या बैलाने शिंग खूपसल्‍याने ती जखमी होण्‍याची घटना घडली. त्‍यानंतर तिला तातडीने दक्षिण गोवा जिल्‍हा इस्‍पितळात हलविण्‍यात आले. तिथे तिच्‍यावर उपचार करण्‍यात आले.

घटना सकाळी 11 वाजण्‍याच्‍या सुमारास घडली. मॉरिस या आपल्‍या अन्‍य साथीदारांबरोबर बाणावली समुद्र किनार्‍यावर आल्‍या होत्‍या. त्‍या किनार्‍यावर फिरत असतानाच कुत्रे मागे लागल्‍याने एक बैल उधळला आणि जोरात पळत असताना त्‍याचे शिंग या महिलेच्‍या पायाला लागले.

तिला दक्षिण गोवा इस्‍पितळात आणल्‍यानंतर तिच्‍या पायाला पाच टाके घालण्‍यात आले. ही महिला आता बरी असल्‍याची माहिती जिल्‍हा इस्‍पितळाच्‍या सुत्रांनी दिली.