उसगाव: गांजे-उसगाव परिसरातील म्हादई नदीत रविवारी (1 जून) दुपारी आंघोळीसाठी गेलेल्या सहा तरुणांपैकी दोघे पाण्यात बुडाल्याची दुर्दैवी घटना घडली. दोघेजण पाण्यात अडकले असून त्यांची सुटका करण्यासाठी सध्या पोलीस आणि अग्निशमन दलाकडून युद्धपातळीवर शोध आणि बचावकार्य सुरु आहे.

मिळालेल्या माहितीनुसार, सहा तरुणांचा एक गट रविवारी दुपारी आंघोळीसाठी म्हादई नदीच्या काठावर गेला होता. पाण्याचा अंदाज न आल्यामुळे आणि नदीचा प्रवाह जोरात असल्याने यातील काही तरुण अचानक खोल पाण्यात ओढले गेले. यामध्ये दोनजण पूर्णपणे बुडाले असून त्यांचा शोध सुरु आहे. तर इतर दोघे पाण्यातील एका खडकावर अडकले आहेत.

दरम्यान, घटनेची माहिती मिळताच फोंडा पोलीस आणि अग्निशमन विभागाचे पथक तातडीने घटनास्थळी पोहोचले. तरुणांना सुखरुप बाहेर काढण्यासाठी स्थानिक ग्रामस्थांचीदेखील मदत घेतली जात आहे. दरम्यान, बुडालेल्या दोघांचा शोध घेण्यासाठी गोताखोरांकडून तपास सुरु करण्यात आला आहे. स्थानिक नागरिकांनी प्रशासनाला अधिक जलद प्रतिसाद देण्याची मागणी केली असून, म्हादई नदीचा धोकादायक प्रवाह लक्षात नागरिकांना काळजी घेण्याचे आवाहन करण्यात येत आहे.