Goa Accident Death: जुने गोवे येथील राष्ट्रीय महामार्गावर आज पहाटे साडेपाचच्‍या सुमारास झालेल्या स्वयंअपघातात दुचाकीस्‍वार गजानन उसगावकर (३२, रा. खोर्ली) या युवकाचा मृत्यू झाला. तर, खांडेपार येथे आज रात्री आठच्‍या सुमारास टेम्‍पो व दुचाकी यांच्‍यात‍ झालेल्‍या अपघातात दुचाकीस्‍वार सुरेश नाईक (रा. कुर्टी) हे ठार झाले.

दुचाकीची दुभाजकाला जोरदार धडक

गजानन उसगावकर हा आपल्या दुचाकीवरून पणजीहून खोर्लीच्या दिशेने येत होता. हॉटेल कदंब फर्न्सजवळ पोहोचल्यावर उतरणीवर असलेल्या वळणावर डुलकी लागल्याने त्‍याचा वाहनावरील ताबा सुटला आणि दुचाकीने दुभाजकाला जोरदार धडक दिली. त्यात गजाननचा मृत्यू झाला.

पोलिसांनी घटस्थळी धाव घेऊन पंचनामा केला. गजाननने हेल्मेट परिधान केले होते, परंतु शरीराला गंभीर जखमा झाल्याने त्याचा मृत्यू झाला. उत्तरीय तपासणीनंतर मृतदेह कुटुंबाच्‍या ताब्‍यात देण्‍यात आला. दुसऱ्या अपघातात भरधाव वेगातील टेम्‍पोने धडक दिल्‍यामुळे खांडेपार येथे सुरेश नाईक यांना आपला जीव गमवावा लागला.