चावडी: काणकोण तालुक्यातील मोखर्ड येथे राहत्या घरात दोन ज्येष्ठ बहिणींचे मृतदेह कुजलेल्या अवस्थेत आढळून आल्याने परिसरात खळबळ उडाली. रेखा कामत (७८) आणि मेघा कामत (७२) अशी मृतांची नावे आहेत.

दोन्ही बहिणी मोखर्ड येथील आपल्या घरात राहत होत्या. त्या फारशा लोकांमध्ये मिसळत नसल्याचे स्थानिकांनी सांगितले. रविवारी त्यांच्या घरातून दुर्गंधी येऊ लागल्याने वाड्यातील नागरिकांनी कुंकळ्ळी येथे राहणाऱ्या त्यांच्या भावाला दूरध्वनीवरून माहिती दिली.

भावाने मोखर्ड येथे येऊन घराची पाहणी केल्यानंतर काणकोण पोलिसांना याची माहिती देण्यात आली. पोलिस घटनास्थळी दाखल झाले. घराचे दार उघडून पाहणी केली असता दोन्ही बहिणींचे मृतदेह कुजलेल्या अवस्थेत आढळले. पोलिसांनी पंचनामा करून मृतदेह शवविच्छेदनासाठी पाठविले आहेत.

दोन्ही बहिणींच्या मृत्यूमुळे परिसरात विविध तर्कवितर्कांना उधाण आले आहे. काही स्थानिकांनी आत्महत्येची शक्यता व्यक्त केली असली, तरी मृत्यूचे नेमके कारण शवविच्छेदन अहवालानंतरच स्पष्ट होणार आहे. याप्रकरणी काणकोण पोलिस अधिक तपास करीत आहेत.