गोव्यातून बेकायदेशीररित्या मद्यसाठा गुजरात येथे घेऊन जाणाऱ्या संशयित गोपालभाई सोळंकी (38) व मनोहर खमादिया (19) यांना कोकण रेल्वे पोलिसांनी मडगाव स्थानकावरच बेड्या ठोकल्या. त्यांच्याकडून सुमारे 15 हजारांच्या व्हिस्की, रमच्या 1990 बाटल्या जप्त केल्या आहेत.

मडगाव रेल्वे स्थानकावर गस्तीवर असणाऱ्या कोकण रेल्वे पोलिसांच्या कर्मचाऱ्यांना दोघांच्या हालचाली संशयास्पद वाटल्या. पोलिसांनी त्यांची चौकशी केली असता,त्यांना योग्य उत्तरे देता आली नाहीत. त्यामुळे दोघांकडील बॅगांची झडती घेण्यात आली. तेव्हा ते दोघे संशयित बेकायदेशीररित्या गोव्यातून मद्यसाठा गुजरात याठिकाणी विक्रीसाठी घेऊन जात असल्याचे समोर आले.

संशयित गोपालभाई सोळंकी व मनोहर खमादिया हे दोघेही सुरेंद्रनगर गुजरात येथील आहेत. गुजरातमध्ये दारुबंदी असल्याने गोवा बनावटीची दारु रेल्वेतून नेऊन तिथे विकली जाणार होती. त्यामुळे दोन बॅगा भरून मद्यसाठा त्यांनी सोबत घेतला होता. कोकण रेल्वे पोलीस निरीक्षक सुनील गुडलर यांच्यासह कॉ. सत्यवान नाईक, समीर शेख, कुलदीप गावकर, श्रीनिवास रेड्डी, अमरदीप चौधरी यांनी हे कारवाई केली. पुढील तपास केला जात आहे.