Two Accused Nabbed In Karnataka: यापूर्वी एका खून प्रकरणात अटक करण्यात आलेल्या, पण सध्या जामिनावर मुक्त झालेल्या सादिक बळ्ळारी या युवकाचा रुमडामळ-दवर्ली येथे दिवसाढवळ्या खून करण्याचा प्रकार घडल्याचे समोर आले होते. या प्रकरणी मायणा-कुडतरी पोलिस तपास करीत होते.

दरम्यान या प्रकरणात दोघा संशयितांना कर्नाटक येथून ताब्यात घेण्यात पोलिसांना यश आले आहे. आज सकाळी रुमडामळ येथे खून करुन ते कर्नाटकात पळून गेल्याची माहिती प्राप्त होत आहे.

शुक्रवारी सकाळी 10 वाजण्याच्या सुमारास ही घटना घडली. सादिक बळ्ळारी याची आई व वडील घरातून बाहेर पडल्यानंतर तो घरी एकटाच असल्याचे पाहुन संशयित मारेकरी घरात आत शिरले व सादिकच्या गळ्यावर चॉपरचे वार करून त्याची निर्घृण हत्या केली आणि त्यानंतर ते पळून गेले.

ते पळून जातानाचे दृष्य या भागातील सीसीटीव्ही कॅमेऱ्यात कैद झाले आहे. पोलिसांनी तत्काळ वेगाने चक्रे फिरवत फरार संशयितांचा शोध घेण्यास सुरुवात केली.

संशयित कर्नाटकच्या दिशेने गेल्याची माहिती पोलिसांना प्राप्त झाली. मायणा कुडतरी पोलीसांच्या एका पथकाने कर्नाटकातून संशयितांना ताब्यात घेतले. तौसिफ कडमणी आणि कादर खान अशी या संशयितांची नावे आहेत.