पणजी: तुये येथे शंभर कोटीहून अधिक रूपये खर्चून ‘गोमेकॉ’शी संलग्न करता येईल, असे भव्य हॉस्पिटल इमारत उभारून आता ८ वर्षे होत आली परंतु तिचे लोकार्पण रखडले आहे, तिथे आवश्‍यक गोष्टी अद्याप आलेल्या नाहीत.

पेडणेच्या जनतेला उत्तम वैद्यकीय सेवा पुरविण्याच्या दृष्टीने सरकारने तुयेतील हॉस्पिटल लवकर सुरू करा, अन्यथा डिसेंबरमध्ये आंदोलन छेडू, असा इशारा तुये हॉस्पिटल कृती समितीचे देवेंद्र प्रभुदेसाई यांनी दिला.

तुये हॉस्पिटल संबंधी आरोग्य संचालनालयात निवेदन दिल्यानंतर ते माध्यमांशी बोलत होते. यावेळी समितीचे इतर सभासदही उपस्थित होते. दरम्यान प्रभुदेसाई म्हणाले, तुयेतील हॉस्पिटलला मागील ८ वर्षात पाच वेळा रंगरंगोटी केली परंतु अजून ते पेडणेकरांच्या सेवेसाठी सुरू केले जात नाही.

हे हॉस्पिटल ‘पीपीपी’ तत्त्वावर सुरू करण्याचा विचार सरकार करत आहे, परंतु आम्हाला ‘गोमेकॉ’शी संलग्न असणारेच हॉस्पिटल हवे आहे. या हॉस्पिटलसाठी लागणाऱ्या उपकरणांसाठी १३ कोटींची निविदा काढण्यास समंती दिली होती परंतु अजून निविदा काढली गेली नाही.

पेडणे हा ग्रामीण भाग आहे, पर्यटनाच्या दृष्टीने देखील महत्त्वाचा आहे त्यामुळे येथे एक चांगले हॉस्पिटल उभारणे गरजेचे आहे. माजी मुख्यमंत्री लक्ष्मीकांत पार्सेकरांनी आपल्या कार्यकाळात या हॉस्पिटलसाठी प्रयत्न केले परंतु त्यांच्यानंतरच्या आमदारांनी जो पाठपुरावा करून हॉस्पिटल सुरू करायला हवे होते, ते झालेले नाही. ही वस्तुस्थिती असल्याचे प्रभुदेसाई यांनी सांगितले.