वाळपई : हळदीला पिवळे सोने म्हटले जाते. हळदीचे गोव्याशी अतूट नाते आहे. गोव्याचे सुपुत्र डॉ. रघुनाथ माशेलकर यांच्यामुळे हळदीचे पेटंट भारताला मिळाले. पण याच भूमीत हे बहुऔषधी गुण असलेले पीक दुर्लक्षित आहे. मात्र आंबेडे-नगरगाव येथील शेतकरी अनिरुद्ध जोशी यांनी एक एकर जमिनीत हळदीची लागवड करून इतरांपुढे आदर्श घालून दिला आहे.

जोशी यांनी प्रथमतः सेलम जातीचे बियाणे आंबेगाव (सावंतवाडी) महाबळ यांच्याकडून आणले. प्रायोगिक तत्त्वावर एक प्लॉट लावला. त्यानंतर यंदा सेलमबरोबर फुले स्वरुपा जातीचे बियाणे पुण्यातून आणून लावण्याचा प्रयत्न केला. गेल्या पाच वर्षांपासून त्यांनी हळदीची वेगवेगळ्या पद्धतीने लागवड केली आहे. यंदाचे हे सहावे वर्ष असून, त्यांना त्यात यश मिळत आहे. राज्यातील शेतकऱ्यांनी तसेच युवा वर्गाने हळद पिकाची लागवड करावी, असे आवाहन त्यांनी केले आहे.

योग्य बाजारपेठ मिळणे आवश्यक

सरकारने विविध योजना आखताना अशा पिकांना योग्य किंमत तसेच बाजारपेठ मिळण्यासाठी हातभार लावला पाहिजे. तसेच बाजारपेठ मिळत नसल्याने शेतकऱ्यांना अडचणींना तोंड द्यावे लागते. तयार झालेल्या हळदीच्या विक्रीसाठी बागायतदारांनी पुढाकार घ्यावा, अशी मागणी शेतकरी करत आहेत.

हळद लागवड अशी करावी...

• दोन ओळींमधील जागा फोडून शेणखत मिसळून भर घालावी. याचा फायदा असा की माती परतली जाते. उन्हामुळे मातीतील कीड मरते व विशेषतः कंद माशीचा प्रादुर्भाव होत नाही.

• भर घातल्याने दोन झाडांमध्ये आलेले तण मातीखाली कुजवले जाते.

• लावणी योग्य वेळेत झाल्यास नागपंचमीपर्यंत रोपे पहिली भर घेण्यासाठी योग्य होतात व दुसरी भर पहिल्या भरीनंतर एका महिन्याने घेणे फायदेशीर ठरते.

• साधारणतः दहा महिन्यांनी पीक काढणीस येते. म्हणजे फेब्रुवारीत पीक काढून होते व हळदीवर प्रक्रिया करण्यास पुरेसा वेळ मिळतो.