वाळपई : पिसुर्ले पंचायत क्षेत्रातील शिंगणे येथे एका ट्रकचालकाने आत्महत्या केली आहे. गुरुदास परब (वय 52) असे त्यांचे नाव आहे. आपल्या हातून दुचाकीस्वाराचा अपघात (Accident) झाल्याने त्यांनी भयभीत होऊन टोकाचे पाऊल उचलले असा प्राथमिक अंदाज व्यक्त होत आहे. मिळालेल्या माहितीनूसार, शुक्रवारी दुपारी साडेबारा एकच्या दरम्यान वांते सत्तरी येथे ट्रकचालक गुरुदास परब हे ट्रक घेऊन व्यवसायासाठी जात होता.

वांते येथे एका ठिकाणी समोरून दुचाकीस्वार नंदा गावकर (रा.वांते) ट्रक खाली आला. त्यात नंदा गंभीर जखमी झाला. तातडीने त्याला लोकांच्या मदतीने गोमेकॉत हलविण्यात आले. मात्र, घटनेत दुचाकीस्वारासोबत काही अघटीत घडले असावे या भीतीने परब घाबरले व घटनास्थळावरून गायब झाले. त्यांचा शोध सुरू होता. पण आज शनिवारी सकाळी ते शिंगणे येथे घरापासून परिसरात असलेल्या काजू बागायतीत गळफास घेतलेल्या अवस्थेत आढळून आले.

वाळपई (valpoi) पोलिसांनी (police) पंचनामा करून पुढील कार्यवाही केली. दरम्यान, अपघातग्रस्त नंदा गावकर गंभीर असून शस्त्रक्रिया करून आयसीयुत दाखल करण्यात आले आहे. ट्रकचालकाने अपघाता नंतर भयभीत होऊन आत्महत्या केली असावी असा प्राथमिक अंदाज व्यक्त केला जातो आहे.