सत्तरी तालुक्यात विविध ठिकाणी मुसळधार पावसाबरोबरच वादळी वाऱ्यामुळे झाडे कोसळून पडली. अडवई-वांते रस्त्यावरील सातेरी मंदिराजवळ सकाळी ७ वाजता फणसाचे झाड पडून वीजवाहिन्या तुटून पडल्या. वाळपई अग्निशमनचे सबऑफिसर श्रीकांत गावकर, चालक आदम खान, फायर फायटर उमेश गावकर, आनंद शेटकर आदींनी अडवई--वांते येथे जाऊन रस्ता वाहतुकीस मोकळा केला.

दुसऱ्या घटनेत सकाळी ११.२५ वा. पाली गावातील गोकुळदास गावकर यांच्या घरावर फणसाचे झाड कोसळून तीस हजारांचे नुकसान झाले. त्यात साठ हजारांची मालमत्ता वाचविण्यात अग्निशमन दलाला यश आले आहे. त्यावेळी अरविंद देसाई, तुळशीदास झर्मेकर, सतीश नाईक, गंगाराम पावणे, कालिदास गावकर यांनी मदतकार्य केले.

कोपार्डे येथे क्रीडा मैदानाजवळ अमित सावंत यांच्या घरावर फणसाचे झाड कोसळून पाच हजारांचे नुकसान झाले आहे. त्यात दहा हजारांची मालमत्ता वाचविली आहे. अग्निशमन दलाचे साईनाथ सावंत, बाबुराव गावस, प्रतेश गावकर यांनी मदतकार्य केले. ब्रह्माकरमळी येथे मंदिराजवळ जंगली झाड वीजवाहिन्यांवर कोसळले.