केपे: राज्यात अनेक ठिकाणी झाडे उन्मळून पडण्याच्या घटना घडत असून केपेत बऱ्याच ठिकाणी झाडे मोडून पडल्याने लोकांचे नुकसान झाले आहे. २९ जुलै रोजी मध्यरात्री आलेल्या वादळी वाऱ्यामुळे श्री रामनाथ दामोदर देवस्थानजवळ पिंपळाचे झाड पडल्याने एका हॉटेलचे काही प्रमाणात नुकसान झाले आहे. सदर झाड रात्रीच्‍यावेळी पडल्याने मोठी हानी टळली. सदर झाड मुदत अग्निशामक दलाने बाजूला काढले.

जांबावली येथे देवस्थानजवळ पिंपळाचे झाड अर्ध्यावर मोडून पडल्याने देवस्थानजवळ जाणारा एका बाजूचा रस्ता बंद होता.

सदर झाडाच्या फांद्या बऱ्याच लांब असल्याने झाडाजवळच असलेल्या एका हॉटेलवर फांद्या पडल्याने या हॉटेलचे छप्पर व आतील सामानाची मोडतोड झाल्याने सुमारे दोन लाख रुपयांचे नुकसान झाले असल्याचे कुडचडे अग्निशामक दलाचे निरीक्षक दामोदर जांबावलीकर यांनी सांगितले.