मुसळधार पाऊस आणि वादळी वाऱ्यामुळे सीमेपाईण - म्हार्दोळ येथील एका घरावर झाड पडून पती - पत्नी दोघेही गंभीर जखमी झाले. ही दुर्घटना आज (शुक्रवारी) दुपारी सव्वा वाजण्याच्या सुमारास घडली. गुलमोहरचे भले मोठे झाड अचानकपणे घरावर पडल्याने घराची मोठी हानी झाली आहे.

या घटनेत रामदास नाईक व त्यांची पत्नी शशिकला नाईक दोघेही जखमी झाले आहेत. शशिकला नाईक यांच्यावर मडकई आरोग्य केंद्रात उपचार करण्यात आले, तर रामदास नाईक यांना बांबोळी येथील गोवा वैद्यकीय महाविद्यालय इस्पितळात उपचारासाठी दाखल करण्यात आले आहे.

झाड कोसळल्यामुळे घराच्या दर्शनी भागाची पूर्णपणे हानी झाली असून छताचे मोठे नुकसान झाले आहे. या दुर्घटनेवेळी घरातील इतर सदस्य दुसऱ्या खोलीत होते, त्यामुळे ते सुदैवाने बचावले. ही दुर्घटना घडल्यानंतर पंचायत सदस्य तसेच तलाठी व इतरांनी येऊन पाहणी केली. अग्निशमन दलाच्या जवानांनी झाड हटविण्यासाठी कार्यवाही सुरू केली आहे.