Bordem Tree Collapsed

डिचोली: वाऱ्यासह पडलेल्या पावसाच्या तडाख्यात डिचोलीत जिवंत वीजवाहिन्यांवर आंब्याची भलीमोठी फांदी कोसळली. अग्निशमन दल आणि वीज खात्याच्या कर्मचाऱ्यांनी वेळीच मदतकार्य केल्याने संभाव्य अनर्थ टळला.

ही घटना गुरुवारी सायंकाळी उशिरा बोर्डे येथील श्री महामाया मंदिर परिसरात मुख्य रस्त्याला जोडून असलेल्या अंतर्गत रस्त्यावर घडली. गुरुवारी सायंकाळी डिचोली परिसरात जोरदार पर्जन्यवृष्टी झाली. पावसाच्या तडाख्यात बोर्डे येथे आंब्याची भलीमोठी फांदी कोसळली.

डिचोली अग्निशमन दलाला या घटनेची माहिती मिळताच लिडींग फायर फायटर साईनाथ केसरकर यांच्या नेतृत्वाखाली संदीप परब (चालक ऑपरेटर), समीर शेट्ये, आनंद नाईक आणि रूपेश गावस या दलाच्या जवानांनी घटनास्थळी धाव घेतली.

अग्निशमन दलाचे जवान घटनास्थळी पोहोचले त्यावेळी वीजवाहिन्या विद्युतभारित होत्या. वीज खात्याला कळविण्यात आल्यानंतर वीज खात्याच्या कर्मचाऱ्यांनी वीजप्रवाह बंद केला. नंतर अग्निशमन दलाच्या जवानांनी मदतकार्य करून कोसळलेली आंब्याची फांदी बाजूला केली.