शिवोली : बामणवाडा-शिवोली येथील रोहिदास कुंडईकर यांच्या गॅरेजवर मंगळवारी पहाटे गॅरेजलगतचे झाड कोसळून पडल्याने अंदाजे पस्तीस हजारांचे नुकसान झाले. अन्य एका घटनेत मधलेभाट-शिवोली येथील धारगळकर यांच्या घरावर दोन माड कोसळून पडल्याने घराची तसेच घरातील प्रापंचिक साहित्याचीही हानी झाली. या घटनेत धारगळकर कुटुंबीयांचे लाखाेंचे नुकसान झाले.

दरम्यान, दोन्ही ठिकाणच्या घटनांत म्हापसा अग्निशमन दलाच्या कर्मचाऱ्यांनी तेथील रस्ता चिंचोळा असल्याची सबब पुढे करून घटनास्थळावरून काढता पाया घेतल्याचे स्थानिक रहिवाशांनी सांगितले. सामाजिक कार्यकर्ते संतोष आगरवाडेकर यांनी या घटनेची माहिती तात्काळ म्हापसा अग्निशमन दलाला देऊन स्वतः मदतीसाठी धाव घेतली. स्थानिकांच्या मदतीने गॅरेजवरील झाड दूर केले.

दरम्यान, घटनास्थळी दाखल झालेल्या म्हापसा अग्निशमन दलाच्या कर्मचाऱ्यांनी तेथील रस्ता चिंचोळा असल्याने मदतकार्य करण्यास असमर्थता दर्शविली. गॅरेजमध्ये पार्क करून ठेवलेली कार यावेळी बचावली. दरम्यान, स्थानिक आमदार दिलायला लोबो यांना घटनेची माहिती देऊन संकटग्रस्त कुटुंबांना आर्थिक मदत मिळवून देण्याचा प्रयत्न करणार असल्याचे मोनाली आगरवाडेकर यांनी सांगितले.