मडगाव: संसर्गामुळे हृदय, श्वसनक्रिया बंद पडल्याने माडेल येथील १४ वर्षीय मुलाचा मृत्यू झाला आहे. त्याला दक्षिण गोवा जिल्हा रुग्णालयात उपचारासाठी दाखल करण्यात आले होते. उपचार सुरु करण्यापूर्वीच त्याचा मृत्यू झाल्याचे समोर आले. गेल्या चार दिवसांपासून त्याला ताप येत होता, असे त्यांच्या कुटुंबीयांनी सांगितले.

अरसिफ खान (१४) असे मृत्यू झालेल्या १४ वर्षीय मुलाचे नाव आहे. गेल्या काही दिवसांपासून त्याची तब्येत ठीक नव्हती, सातत्याने ताप येत असल्याने तो अशक्त झाला होता. दरम्यान, १५ ऑक्टोबर रोजी पहाटे तब्येत फारच बिघडली आणि त्याला उलट्या होऊ लागल्या. उपचारासाठी त्याला रुग्णालयात दाखल करण्यात आले पण, उपचार सुरु करण्यापूर्वीच त्याचा मृत्यू झाल्याचे डॉक्टरांनी सांगितले.

फातोर्डा पोलिसांनी याप्रकरणी मृत अरसिफ याची आई राबिया खान यांची चौकशी केली असता, त्यांनी मुलगा गेल्या काही दिवसांपासून आजारी असल्याचे सांगितले. त्याला सातत्याने ताप येत होता आणि उलट्याही झाल्याचे त्यांनी सांगितले. दरम्यान, संसर्गामुळे हृदय  आणि श्वसनक्रिया बंद पडल्यामुळे अरसिफचा मृत्यू झाल्याचे शवचिकित्सा अहवालातून स्पष्ट झाले आहे.