पणजी: गोव्यातून अपघाती मृत्यूच्या दोन घटना समोर आल्या आहेत. नारळाचे झाड तोडण्यासाठी गेलेल्या ६० वर्षीय व्यक्तीचा मृत्यू झाल्याची घटना चांदर येथे घडली आहे. तर, धारबांदोडा येथे अपघातात पश्चिम बंगाल येथील तरुणाचा मृत्यू झाल्याची घटना समोर आली आहे.

नारळाच्या झाडावरुन पडून मृत्यू

चांदर येथे घडलेल्या घटनेत सिल्वेस्टर फिलिप (वय ६०. रा. चांदर) असे या घटनेत मृत्यू झालेल्या व्यक्तीचे नाव आहे. फिलिप नारळाचे झाड तोडण्यासाठी गेले असता ते खाली कोसळले. गंभीर जखमी झालेल्या फिलिप यांचा यात मृत्यू झाल्याची माहिती समोर आली आहे.

धारबांदोडा येथे अपघात

धारबांदोडा येथे रस्त्यावर पार्क केलेल्या कंटेनरला रिक्षाची धडक बसून झालेल्या अपघातात सनित चंद्रा गीताल (२५, बाणास्तारी, मूळ पश्चिम बंगाल) याचा मृत्यू झाला आहे. तर, रिक्षा चालक उत्तम गवळी (४८, बाणास्तारी) हा जखमी झाला आहे.