Goa Traffic Police: गोव्यातील वाढत्या अपघातांच्या पार्श्वभूमीवर गोवा वाहतूक पोलीस आणि सरकार अधिकच सतर्क झाले आहे. जास्त करून अपघात हे वाहतूक नियमांचे उल्लंघन केल्यानेच होतात हे निदर्शनास आल्यावर वाहतूक पोलीस विभाग अॅक्शन मोडमध्ये आहे. राज्यभरात ठिकठिकाणी पोलिसांनी नियम मोडणाऱ्या वाहनचालकांवर कारवाई करत दंड आकारण्यास सुरुवात केली आहे.

शुक्रवारी गोवा पोलिसांनी राज्यभरात सुमारे 2,000 वाहतूक उल्लंघनांवर गुन्हा दाखल करून केवळ एका दिवसात 10 लाख रुपयांहून अधिक दंड वसूल केला. यावेळी डेप्युटी एसपी सिद्धांत शिरोडकर म्हणाले की, गेल्या वर्षी याच दिवशी वाहतूक पोलिसांनी अवघे दोन लाख रुपये जमा केले होते.

गेल्या काही दिवसांपासून वाहतूक शाखेकडून नियमभंग करणाऱ्यांवर कारवाईची मोहीम राबवली जात आहे. शिरोडकर म्हणाले की, ही वाहतूक कारवाई करण्यामागे रस्त्यावरील जीवितहानी कमी करणे हाच उद्देश आहे. पेडणे, कळंगुट, पर्वरी आणि मोपा येथील ट्रॅफिक विभागाने उत्तर गोव्यात वाहतूक उल्लंघनाची सर्वाधिक प्रकरणे नोंदवली आहेत, तर दक्षिण गोव्यात, मडगाव वाहतूक विभागातर्फे सर्वाधिक प्रकरणे नोंदवण्यात आली आहेत.