सासष्टी: मडगाव येथील घाऊक मासळी मार्केटमध्ये गोमंतकीय पारंपरिक मासळी विक्रेत्यांनी आज निषेध करून मासळी विक्रीसाठी जागा देण्याची मागणी केली. केवळ परप्रांतीय मच्छीमारांनाच मार्केटमध्ये प्रवेश दिला जातो व आमची वाहने बाहेर ठेवली जातात. मार्केटच्या बाहेर जिथे आम्ही बसतो तिथे त्यांची वाहने आणून ठेवली जातात. अशाप्रकारे आमची सतावणूक चालू सुरू असल्याचे स्थानिक मासळी विक्रेत्यांनी सांगितले.

दरम्यान, हा प्रश्‍न विधानसभेत शून्य तासात बाणावलीचे आमदार व्हेन्झी व्हिएगस यांनी उपस्थित केला. मुख्यमंत्र्यांनी यात लक्ष घालावे व गोमंतकीय पारंपरिक मासळी विक्रेत्यांच्या अडचणी दूर कराव्यात, अशी मागणी केली.

गोमंतकीय मासळी विक्रेत्यांकडे ताजी मासळी असते, तर या परप्रांतीय मासळी विक्रेत्यांची मासळी बर्फामुळे गोठलेली असते, असे व्हेन्झी यांनी सांगितले.

यावर मुख्यमंत्री डॉ. प्रमोद सावंत यांनी सांगितले की, या घाऊक मासळी मार्केटमध्ये किरकोळ विक्री करता येत नाही. यावेळी व्हेन्झी यांनी सांगितले की, गोमंतकीय मासळी विक्रेत्यांना त्यांच्या वाहनातून मासळी उतरवू दिली जात नाही. तसेच गोमंतकीय मासळी विक्रेत्यांना सकाळी ११ वा.पर्यंत तिथे बसण्यास मुभा द्यावी.

दरम्यान, काही महिन्यांपूर्वी याच प्रश्र्नावरुन मोठा गोंधळ झाला होता व नंतर गोमंतकीय मासळी विक्रेत्यांना सकाळी ११ वा.पर्यंत आपली वाहने घाऊक मासळी मार्केटमध्ये आणण्याची मुभा देण्यात आली होती.