Panaji Smart City: राजधानी पणजीत भारामुळे रस्ते खचून त्यात अवजड वाहने रुतण्याचे प्रकार थांबण्याचे काही नाव घेत नाहीत, असे दिसते.

सांतिनेजमध्ये सोमवारी (ता.17) दुपारी 12.30 वा.च्या सुमारास पाणी वाहून नेणाऱ्या टँकरच्या मागील टाकीच्या ओझ्यामुळे रस्ता खचला आणि त्यात त्या टाकीचे चाक अडकून पडले. त्यामुळे नेहमीप्रमाणे सांतिनेजमध्ये वाहतूक कोंडीचा प्रकार काही वेळ दिसून आला.

राजधानीच्या सर्व भागातून येणाऱ्या मलनिस्सारण वाहिन्यांतून येणारे सांडपाणी सांतिनेजमधून मोठ्या वाहिनीतून टोंक येथील प्रकल्पात नेले जाणार आहे. त्यासाठी मोठ्या व्यासाच्या वाहिन्या टाकण्याचे काम सुरू आहे.

गेली दीड-दोन महिन्यांपासून या परिसरात हे काम सुरू आहे. याठिकाणी मागील वेळेस टँकर आणि अवजड डंपरही रुतण्याचा प्रकार घडला होता.

‘ड्रिलिंग’चा परिणाम

भूमिगत मोठी वाहिनी टाकण्यासाठी करण्यात येत असलेल्या ड्रिलिंगमुळे त्या यंत्राच्या बाजूचा आणि वरचा भागही ठिसूळ बनत आहे. जमिनीतील मातीत चिकटपणा नसल्याने माती ओझामुळे खचते, असे प्रकार घडतात.

डांबरीकरणामुळे वरून हा प्रकार दिसून येत नाही, वाहनांच्या ओझ्यामुळे खचलेल्या जागेत चाक रुतल्यानंतर तो प्रकार दिसून येतो, असे येथील कर्मचाऱ्यांचे म्हणणे आहे.