पणजी: गोव्यातील प्रसिद्ध पर्यटनस्थळ कांदोळी येथे शनिवारी (१९ एप्रिल) एका ज्वेलरी दुकानात दरोडा टाकून चोरी करणाऱ्या तीन पर्यटकांना स्थानिक नागरिकांच्या सतर्कतेमुळे काही तासांतच ताब्यात घेण्यात आलं. आरोपींनी दुकानातून एक ब्रेसलेट आणि इतर काही वस्तू चोरल्या होत्या.

समोर आलेल्या माहितीनुसार, कांदोळी येथील एका दागिन्यांच्या दुकानात तीन पर्यटकांनी प्रवेश केला आणि एका सोन्याच्या ब्रेसलेटसह काही मौल्यवान वस्तू चोरून पसार झाले.

याच दरम्यान, बंगळुरूचा रहिवासी मनोज सिम्हिया (वय २१) समुद्रकिनाऱ्यावर फेरफटका मारत असताना त्याने या तिघांना दुकानातून चोरी केल्यानंतर पसार होताना पाहिलं होतं. संशय येताच त्याने तत्काळ स्थानिक नागरिकांना याची माहिती दिली आणि नंतर पोलिसांना कळविण्यात आलं.

कांदोळी पोलिसांनी मिळालेल्या माहितीच्या आधारे घटनास्थळी तात्काळ धाव घेतली आणि काही वेळातच तिघांना ताब्यात घेतलं. त्यांच्याकडून चोरी केलेलं सोन्याचं ब्रेसलेट तसेच इतर मौल्यवान वस्तू हस्तगत करण्यात आल्या आहेत. पोलिसांकडून या प्रकरणाचा सखोल तपास सुरू आहे.

गोवा हे देशभरातील एक प्रसिद्ध पर्यटन स्थळ असले तरी, काही पर्यटकांमुळे येथील कायदा-सुव्यवस्थेला धोका निर्माण होण्याची प्रकरण अधूनमधून समोर येतात. पोलिस प्रशासनाने अशा घटनांवर कठोर कारवाई करत आहे.