Tomato Price Hike: एरवी 15 ते 20 रुपये प्रतिकिलो मिळणाऱ्या टोमॅटोने आपला ‘रंग’ दाखवायला सुरूवात केली आहे. सध्या टोमॅटोची आवक घटली असून मागणी मात्र वाढली आहे. डाळीसह विविध भाज्यांमध्ये हमखास वापरला जाणारा हा टोमॅटो सध्या सर्वसामान्यांना परवडेनासा झालाय.

आज सोमवारी खुल्या बाजारात लहान टोमॅटो 60 रुपये तर मोठे टोमॅटो 80 रुपये किलो दराने विकले जात आहेत. तर, सबयार्डमध्ये किरकोळ 60 रुपये तर घाऊक 50 रुपये किलो असा टोमॅटोचा दर आहे. त्यामुळे गृहिणींचे आर्थिक बजेट कोलमडले आहे.

किरकोळ व घाऊक या दोन्ही बाजारात सध्या टॉमेटोचे दर दुप्पट झालेले आहेत. परराज्यांतून होणारी टोमॅटोची आवक कमी झाल्याने त्‍याचे भाव वधारल्याचे व्यापाऱ्यांचे म्हणणे आहे. शेजारच्‍या राज्‍यांत जास्त पाऊस पडल्याने टोमॅटोच्या उत्पादनावर परिणाम झालाय.

शिवाय दुसरे नवीन पीक येण्यास विलंब झालाय. तो येण्यास अजून पंधरा ते वीस दिवस जातील. त्यानंतर स्थिती सुधारेल, अशी माहिती गोवा कृषी मार्केटिंग बोर्डाचे सदस्य अमेय नाटेकर यांनी दिली.

पंधरा दिवसांत स्‍थिती सुधारेल : प्रेमेंद्र शेट

फलोत्पादन महामंडळाच्या दुकानांमध्‍ये टोमॅटो सध्या 55 रुपये प्रतिकिलो दराने विकला जातोय. हे दर आज सोमवारी 52 रुपये किलो होते, तर काल रविवारी हाच दर 54 रुपये होता.

याबाबत फलोत्पादन महामंडळाचे अध्यक्ष आमदार प्रेमेंद्र शेट यांच्याशी संपर्क साधला असता ते म्हणाले की, फलोत्पादन दुकानात टोमॅटोचे दर सर्वात कमी आहेत.

इतरत्र हे दर 60 ते 80 रुपयांपर्यंत गेलेले आहेत. टोमॅटोचे पीक नष्ट झाल्याने दरावर परिणाम झाला आहे. ही स्थिती सुधारण्यास आणखी कमीत कमी 15 दिवस जातील.