Mahadayi Water Dispute: केंद्रीय जल आयोगाने म्हादई नदीवरील प्रकल्पाच्या कर्नाटकच्या नव्या डीपीआरला मंजुरी दिल्यानंतर गोव्यात जनक्षोभ उसळला आहे. तेव्हापासून विविध घटकांतून या विरोधात आवाज उठवला जात आहे. आता रिव्होल्युशनरी गोवन्स या पक्षानेही म्हादईसाठी आपली भूमिका स्पष्ट केली आहे. म्हादई बचावसाठी 'टुगेदर फॉर म्हादई' मोहिम सुरू केल्याची माहिती पक्षाचे अध्यक्ष मनोज परब यांनी दिली.

या मोहिमेंतर्गत पक्ष नेमका काय कार्यक्रम राबविणार आहे, याची माहिती, मनोज परब यांनी दिली. ते म्हणाले की, या मोहिमेंतर्गत मी आणि माझे समर्थक म्हादईसाठी लढण्यासाठी सज्ज झालो आहोत. आम्ही आमची म्हाईदबाबतची भूमिका घराघरात नेऊन पोहचवू. तसेच म्हादई बचावसाठी आम्ही सह्यांची मोहिमही राबवणार आहोत.

परब म्हणाले की, म्हादईबाबत विरोधक एकत्र आले आहेत. पण आम्ही या विरोधकांच्या ऐक्यामध्ये नाही. कारण विरोधक दुटप्पी आहेत आणि त्यांना गोवा विकायचा आहे, अशी घणाघाती टीकाही त्यांनी केली.

कर्नाटकच्या सुधारित प्रकल्प आराखड्याला मंजुरी देण्याला आता आठवडा उलटत आला आहे. सत्ताधारी भाजपने न्यायालयाचा दरवाजा ठोठावत केंद्रीय जलशक्ती मंत्र्यांना हा आराखडा मागे घेण्यासाठी निवेदन सादर केले आहे. हा आराखडा तातडीने मागे घ्यावा, यासाठी रविवारी पणजी, प्रियोळ येथे जाहीर सभा झाल्या. 16 जानेवारी रोजी मुख्यमंत्री डॉ. प्रमोद सावंत यांच्या साखळीत थेट जनआंदोलन करण्याचा निर्धार ‘सेव्ह म्हादई, सेव्ह गोवा फ्रंट’ने केला आहे.