BJP National President Election

पणजी: भारतीय जनता पक्ष, गोवा प्रदेशाकडून शुक्रवारी (दि. १७ जानेवारी) रोजी केंद्रीय अध्यक्ष पदाच्या निवडणुकीसाठी तीन मतदारांची निवड केली गेलीये. दिलिप परुळेकर, वासुदेव मेंग गावकर व सुवर्णा तेंडुलकर या तीन मतदारांची नेमणूक भारतीय जनता पक्ष गोवा तर्फे करण्यात आलीये. देशातील पन्नास टक्के राज्यांचे प्रदेशाध्यक्ष निवडले गेले की राष्ट्रीय अध्यक्ष निवडण्याची प्रक्रीया सुरू होणार आहे.

भाजपच्या प्रदेशाध्यक्षपदी कोण?

भाजपच्या प्रदेशाध्यक्षपदी कोण, या गेल्या काही दिवसांत उत्कंठा वाढवणाऱ्या प्रश्नाचे उत्तर शुक्रवार (ता.१७) सायंकाळी साडेसहा वाजता मिळणार आहे. भाजपच्या गाभा समितीची बैठक पक्षाच्या कार्यालयात सायंकाळी 5 वाजता बोलावण्यात आली आहे. त्यानंतर उमेदवार कोण हे स्पष्ट होणार आहे. प्रदेशाध्यक्ष निवडणुकीसाठी निरीक्षक म्हणून पक्षाचे राष्ट्रीय सरचिटणीस सुनील बन्सल उपस्थित राहतील.

शनिवारी सकाळी १० वाजता गोमंतक मराठा समाज सभागृहात होणाऱ्या राज्यभरातील कार्यकर्ता मेळाव्यात प्रदेशाध्यक्षपदाच्या नावाची घोषणा करण्यात येणार आहे.

प्रदेशाध्यक्षपदासाठी मतदान घेण्याची वेळ आली, तर राज्य कार्यकारिणीचे ५४ सदस्य, मुख्यमंत्री डॉ. प्रमोद सावंत, आरोग्यमंत्री विश्वजित राणे व पंचायतमंत्री माविन गुदिन्हो, केंद्रीय राज्यमंत्री श्रीपाद नाईक व खासदार सदानंद शेट तानावडे असे ५९ जण मतदान करतील.