Loliem Crime: काणकोणात लोलये पंचायत क्षेत्रातील बंद घरांवर चोरट्यांची लक्ष्य केले आहे. लोलये क्षेत्रातील दापट येथील तीन बंद घरे फोडून एका घरातून सुमारे तीस लाखांचा ऐवज लंपास केला आहे. त्यात सोन्याच्या दागिन्यांबरोबरच अन्य मौल्यवान वस्तूंचा समावेश आहे. या सर्व बंद असलेल्या घरातील कुटुंबीय कामानिमित्त लंडनमध्ये आहेत.

दापट येथील आलुलिया फर्नांडिस यांच्या घराचे प्रवेशद्वार तोडून अज्ञात चोरट्यांनी घरात प्रवेश केला व त्यांच्या घरातील कपाटे व सुटकेस फोडल्या. तेथे चोरट्यांच्या हाती काहीच लागले नाही, परंतु चोरट्यांनी घरातील किमती दारूच्या बाटल्या लंपास केल्या. या घराच्या जवळच असलेल्या लेलिस डिसिल्वा यांच्या बंद घरात प्रवेश करून चोरट्यांनी दागिन्यांसह सुमारे तीस लाख रुपये किमतीच्या मौल्यवान वस्तू लंपास केल्या.

त्याचप्रमाणे याच भागातील नातालिना कोर्त यांच्या घरात शिरून चोरट्यांनी त्यांच्या घरातील कपाटे उघडून सामान अस्ताव्यस्त केले. या ठिकाणी चोरट्यांच्या हाती काहीच लागू शकले नाही. यासंदर्भात येथील माजी पंच सनी कॉस्ता यांनी दिलेल्या माहितीनुसार, या तीनही घरांतील कुटुंबीय परदेशात असतात. त्यामुळे चोरट्यांनी त्याचा फायदा घेऊन चोरी केली. दरम्यान, गेल्या आठवड्यात पैंगीण बाजारात दोन दुकाने फोडून चोरट्यांनी चोरी केली. पैंगीण पंचायतीने बाजारात सीसीटीव्ही कॅमेरे बसविले आहेत. त्यातील फुटेज पोलिसांनी तपासल्या असता अज्ञात चोरट्यांनी आपला चेहरा झाकला असल्याचे दिसून आले आहे.

बंद घरांची माहिती देण्याचे आवाहन

काणकोणचे पोलिस निरीक्षक हरिष राऊत देसाई यांनी काणकोणमधील रहिवाशांना बंद घरांची माहिती पोलिसांना देण्याचे आवाहन केले. त्याचप्रमाणे संशयित व्यक्ती आपल्या भागात आढळल्यास त्यांचीही माहिती पोलिसांना त्वरित देण्याचे आवाहन केले आहे.