Goa Accident: राज्यात अपघातांचे सत्र सुरुच; बांबोळीत भरधाव कारला दुचाकीची जोरदार धडक

Goa Accident: राज्यात अपघातांचे सत्र सुरूच असून मृत्यूचे तांडव थांबण्याचे काही चिन्ह दिसत नाही. बांबोळीत गेल्‍या रविवारी दोघांचा अपघातात मृत्‍यू झाल्‍याची घटना ताजी असतानाच आज तिथेच झालेल्या अपघातात रोहन खेडेकर (२५, ठाणे-मुंबई) या युवकाला आपला प्राण गमवावा लागला.

आगशी पोलिसांनी दिलेल्‍या माहितीनुसार, हा अपघात मंगळवारी दुपारी सुमारे दीडच्‍या सुमारास घडला. बांबोळी येथील एसएजी स्टेडियम समोरील उड्डाणपुलाच्या उतरणीवर चुकीच्या दिशेने जाण्याच्या प्रयत्नात रोहन खेडेकर याने आपली दुचाकी (एमएच ४८ एएस ८६७१) भरधाव वेगाने चालवत समोरून येणाऱ्या चारचाकीला (जीए ०६ टी ८६१६) ठोकरली. त्यात तो उड्डाणपुलाच्या भिंतीवर आढळला आणि नंतर खाली असलेल्या दगडांवर पडला.

गंभीर जखमी अवस्‍थेत त्‍याला उपचारांसाठी गोमेकॉत दाखल करण्यात आले, पण सायंकाळी त्याची प्राणज्योत मावळली. रोहन खेडेकर याने अतिवेगाने वाहन चालवल्याने हा अपघात घडला, असे पोलिसांनी सांगितले.