Goa-Nagpur Expressway: गोवा- नागपूर या 760 किलोमीटरच्या एक्सप्रेसवेचा 'डीपीआर' तयार करण्यासाठी 3 कंपन्यांकडून निवीदा आल्या आहेत. एल. एन. मालविया इन्फ्रा, मोनार्क सर्वेयर्स आणि टीपीएफ इंजिनियरिंग या 3 कंपन्यांचा समावेश आहे.

राज्य रस्ते विकास महामंडळानं गोवा- नागपूर या 760 किलोमीटर लांबीचा 'ग्रीन फिल्ड सुपरफास्ट' महामार्गाच्या डीपीआरसाठी निविदा मागवल्या होत्या. या महामार्गाचे नाव 'महाराष्ट्र शक्तीपीठ एक्स्प्रेसवे' ठेवण्यात आले आहे. विदर्भ, मराठवाडा, पश्चिम महाराष्ट्र आणि कोकणातील 12 जिल्ह्यांना जोडणाऱ्या महामार्गासाठी 75 हजार कोटी रुपये खर्च अपेक्षित आहे. या महामार्गामुळे नागपूर–गोवा अंतर फक्त आठ तासांत पार करता येणार आहे.

समृद्धी महामार्गाच्या अतंर्गत नागपूर – गोवा महामार्ग बांधण्यात येणार आहे. हा महामार्ग विदर्भातील वर्धा येथून सुरू होणार आहे तर सिंधुदुर्ग-गोवा सीमेवरील पत्रादेवी येथे संपणार आहे. वर्धा येथून हा मार्ग समृद्धी महामार्गाद्वारे नागपूरला जोडण्यात येणार आहे. हा महामार्ग १२ जिल्ह्यांमधून जाणार आहे. एकूणच हा मार्ग विदर्भ, मराठवाडा, पश्चिम महाराष्ट्र आणि कोकणातून जाणार आहे.