Thivim Theft News: आतापर्यंत राज्यात दुचाकी-चारचाकी वाहनांच्या चोरीचे प्रकार घडले आहेत. मात्र, चक्क अजस्त्र जेसीबी मशीन चोरी केल्याचा प्रकार माडेल-थिवी येथे घडला. याप्रकरणी पोलिसांनी तिघांना अटक केली आहे.

थिवी येथील माडेल हाऊसिंग बोर्ड येथे खुल्या जागेत उभे केलेले जेसीबी मशीन (क्रमांक जीए-०१-एस-६५०२) चोरीस गेले. पोलिस उपअधीक्षक जीवबा दळवी यांनी दिलेल्या माहितीनुसार, यमनूर कडकल यांच्या लेखी तक्रारीवरून याप्रकरणी गुन्हा नोंदविण्यात आला. पोलिसांनी चौकशीसाठी त्वरित पथक तैनात केले.

या प्रकरणात तीन जणांचा सहभाग असल्याची माहिती समोर आली. अखेर पोलिसांनी याप्रकरणी रवी धीरप्पा चव्हाण, (रा. साई कॉलनी, माडेल), रवी धकप्पा राठोड (रा. साई कॉलनी, माडेल) आणि प्रकाश सोमू राठोड या मूळच्या कर्नाटकातील तिघांना अटक केली.

पोलिस उपअधीक्षक जीवबा दळवी यांच्या मार्गदर्शनानुसार कोलवाळ पोलिसांनी ही कारवाई केली. या प्रकरणाचा पुढील तपास कोलवाळ पोलिस करत आहेत.

संशयितांकडून गुन्हा कबूल

संशयितांनी ओव्हर-राइडिंग इग्निशन सिस्टीमद्वारे जेसीबी मशीन जबरदस्तीने सुरू करून हे ते शापोरा येथे नेऊन ठेवले. त्यांनी या प्रकरणात आपला सहभाग असल्याचे कबूल केले. संशयितांना अटक करून न्यायालयात हजर केले असता, त्यांना तीन दिवसांची पोलिस कोठडी सुनावण्यात आली.