धर्मनिरपेक्ष देशात जातीयवादी व फुटीरतावादी राजकारणाला थारा नाही, हे कर्नाटकातील मतदारांनी दाखवून दिले आहे, अशी प्रतिक्रिया गोवा फॉरवर्डचे अध्यक्ष व फातोर्डेचे आमदार विजय सरदेसाई यानी कर्नाटकातील विधानसभा निकालावर दिली.

कर्नाटकातील मतदारांनी स्थानिक प्रश्र्नांना जास्त महत्त्व देताना विसंगती व मतभेदाच्या राजकारणाला बाजूला सारले आहे.

गोव्याचे मुख्यमंत्री व गोव्यातील भाजपच्या इतर नेत्यांनी कर्नाटकात जाऊन प्रचार केला खरा; पण त्याचा तेथील मतदारांवर काहीच परिणाम झालेला नाही, हे या निकालावरून स्पष्ट होत असल्याचेही सरदेसाई यांनी म्हटले आहे.

कॉंग्रेस व भाजप या दोन्ही पक्षांनी आता गोव्यापुढे असलेल्या म्हादई नदीचा प्रश्र्न सोडविण्यासाठी प्राधान्य दिले पाहिजे.

गोमंतकीयांची फसवणूक करून म्हादईचे पाणी कर्नाटकात वळविण्याचा जो निर्णय घेतलेला आहे तो मागे घेण्यासाठी गोवा सरकार जर प्रामाणिक व रचनात्मक प्रयत्न करीत असेल तर गोवा फॉरवर्ड पक्ष सरकारच्या पाठीशी उभा राहील.

- विजय सरदेसाई, गोवा फॉरवर्ड