IMD Goa उन्हाळा सुरु होताच गोवेकरांना उन्हाच्या झळा बसू लागल्या आहेत. मागील दोन-चार दिवसांपासून राज्यात कमालीची उष्णता जाणवू लागली आहे. रात्रीचा हलका गारवा कायम असला तरी दिवसा उन्हाच्या झळा जाणवायला लागल्या आहेत. गेल्या चार दिवसांत तापमानात वाढ झाल्याने दुपारनंतर रस्त्यावरून फिरताना उन्हाचे चटके बसत आहेत.

याच संदर्भात हवामान विभागाकडून एक महत्वाची अपडेट समोर येतेय. आज म्हणजेच (दि. 8) आणि 9 मार्च रोजी गोव्यात उष्णतेची लाट येण्याची शक्यता असल्याचे सांगण्यात आले आहे. राज्यातील दैनंदिन कमाल तापमानापेक्षा या दोन दिवसातील तापमान हे 4 ते 6 डिग्री सेल्सियसने जास्त राहणार असल्याचे IMD Goa ने सांगितले आहे.

राज्यात तापमानात वाढ झाली असून उकाडाही वाढला आहे. गोव्यासह लगतच्या कोकण आणि मध्य महाराष्ट्राच्या काही भागात सलग दुसऱ्या दिवशी कमाल तापमानाचा पारा वर चढलेला आढळला.

उष्णता वाढल्याने लोकांनी घराबाहेर पडताना शक्यतो दुपारची 12 ते 3 पर्यंतची वेळ टाळावी. आहारात लिंबू सरबत, ताक, कोकम सरबत यांचा आवर्जून समावेश करावा. तसेच घराबाहेर पडताना टोपी, स्कार्फ वगैरेंचा वापर करावा. शक्यतो सुती कपडे वापरावेत.