Goa Theft Case

कूपवाडा - अडणे, बाळ्ळी येथे भरदिवसा एक घर फोडून चोरट्यांनी 1.20 लाखाच्या रोकडीसह सुमारे दीड लाख रुपये किमतीचा ऐवज लंपास केला.

पोलिसांनी दिलेल्या माहितीनुसार, घरफोडीची ही घटना 25 फेब्रुवारी रोजी सकाळी 10.30 ते दुपारी 2 वाजण्याच्या सुमारास कूपवाडा-अडणे, बाळ्ळी येथील रोहिदास गावकर (60) यांच्या घरी घडली.

घराच्या बाहेरच दाराची चावी ठेवण्यात आलेली होती. चोरट्याने या चावीचा उपयोग करून घरात बेकायदेशीररीत्या प्रवेश केला आणि घरातील शयनकक्षात असलेले कपाट फोडले. कपाटातील रोख 1.20 लाख रुपये आणि 4 ग्रॅम वजनाचे कर्णफूल व 2 ग्रॅम वजनाचा आणखी एक दागिना मिळून दीड लाख रुपये किमतीचा ऐवज लंपास केला. या चोरीप्रकरणी उपनिरीक्षक शिवराम गावस तपास करीत आहेत.