Mapusa Crime News: पती - पत्नी घरातून डॉक्टरकडे गेले असता याचवेळी चोरट्यांनी डाव साधत बंगला फोडला. चोरट्यांनी बंगल्यातून रोख रक्कम आणि दागिने लंपास केले आहेत.

मोंते गिरी, बार्देश येथे सोमवारी सायंकाळी पाचच्या सुमारास ही घटना घडली. भरदिवसा ही घटना घडल्याने परिसरात भीतीचे वातावरण निर्माण झाले.

याप्रकरणी आंतोनेथ डिक्रुझ यांनी म्हापसा पोलीस ठाण्यात फिर्याद दिली आहे.

डिक्रुझ या त्यांच्या पतीसह दवाखान्यात गेल्या होत्या, दरम्यान चोरट्यांनी घरात कोणी नाही याच संधीचा फायदा घेत बंगल्याचा मुख्य दरवाजा, कडीसह तोडला व घरातील रोख रक्कम आणि दागिने लंपास केले.

डिक्रुझ घरी आल्या त्यावेळी घरातील साहित्य अस्ताव्यस्त पडल्याचे त्यांना दिसले. डिक्रुझ यांनी तात्काळ पोलिसांत धाव घेत याप्रकरणी फिर्याद दाखल केली.

पोलीस निरीक्षक सीताकांत नायक यांच्या इतर पोलीस कर्मचाऱ्यांसह घटनास्थळी धाव घेत पंचनामा केला.

मुख्य लोकवस्तीत झालेल्या या चोरीमुळे या परिसरात खळबळ निर्माण झाली असून, येथील कोणीतरी ही चोरी केली असल्याचा संशय फिर्यादींनी व्यक्त केला आहे.