Goa Theft News: म्हापसा येथील बाजारपेठेतील दुकानांना लक्ष्य करणाऱ्या चोरट्यांनी बराच धुमाकूळ घातला आहे. मार्केट परिसरात पोलिस गस्त असतानाही चोरीचे प्रकार घडत आहेत. गेल्या काही दिवसांत चोरट्यांनी चार-पाच दुकाने फोडली. यात ‘शांतादुर्गा हॉटेल’च्या गल्ल्यावर डल्ला मारण्यासह ‘समाधान हॉटेल’मध्ये चोरांने बांगडे तळून खाण्याचीही आश्चर्यकारक घटना घडली आहे.

मंगळवारी ‘समाधान हॉटेल’मध्ये एक संशयित चंदन हरिहर दास (१८, मूळ बिहार) हा झोपलेल्या अवस्थेत सापडला. नंतर हॉटेलमालकाने त्याला पोलिसांच्या स्वाधीन केले. हा प्रकार आज पहाटे 5.30 च्या सुमारास उघडकीस आला.

संशयित ‘शांतादुर्गा हॉटेल’च्या बाहेरील पाण्याच्या टाकीवरून ‘रोहिणी ब्युटी पार्लर’मध्ये घुसला. तिथे काहीच हाती न लागल्याने आतील सामान संशयिताने जाळले. यात पार्लरचे नुकसान झाले. त्यानंतर संशयित पोटमाळ्यावरून ‘शांतादुर्गा हॉटेल’मध्ये खाली उतरला. हॉटेलच्या ‘कॅश काउंटर’मध्ये पैसे नसल्याने त्यात त्याने आग घातली. तसेच सीसीटीव्ही कॅमेरे फोडले.

24 तास गस्तीचे आश्वासन

म्हापसा बाजारातील चोरींच्या घटनांप्रकरणी म्हापसा व्यापारी संघटनेचे अध्यक्ष श्रीपाद सावंत, सचिव सिद्धेश राऊत, खजिनदार जितेंद्र फळारी व पांडुरंग सावंत यांनी पोलिस उपअधीक्षक जीवबा दळवी व निरीक्षक सीताकांत नायक यांची भेट घेऊन निवेदन सादर केले व मार्केटमध्ये घडणाऱ्या चोऱ्या आणि इतर प्रकारांवर आळा घालण्याची मागणी केली. पोलिस गस्त वाढवून मार्केट परिसरात यापुढे आजपासून चोवीस तास पोलिसांचा पहारा ठेवला जाईल, असे आश्वासन उपअधीक्षकांनी या व्यापाऱ्यांना दिले.