Margao Construction: मडगाव येथील रवींद्र भवनचा कायापालट मे महिन्यापर्यंत सार्वजनिक बांधकाम खात्यामार्फत केला जाईल. रवींद्र भवनचे वॉटरप्रुफींग, रंगरंगोटी, एअर कंडिशनरची दुरुस्ती व इतर कामे सार्वजनिक बांधकाम खात्यातर्फे पूर्ण करण्यात येणार आहे, असे सार्वजनिक बांधकाम मंत्री नीलेश काब्राल यांनी मडगावात सांगितले.

गेल्या कित्येक वर्षांपासून रवींद्र भवन इमारतीचा जो दुसरा भाग आहे, त्याबद्दल कंत्राटदार व एजन्सीमध्ये वाद आहे. त्यामुळे हा भाग सार्वजनिक बांधकाम खात्याच्या हवाली केलेला नसल्याने त्या इमारत भागाचा उपयोग केला जात नाही.

त्यांच्यामधील वाद संपुष्टात आणला जाईल, असे मंत्री कब्राल यांनी स्पष्ट केले. आपण सार्वजनिक बांधकाम खात्याचा पदभार सांभाळल्यापासून रवींद्र भवनमध्ये अनेक दुरुस्त्या, सौंदर्यीकरणे केली आहेत. हल्लीच खात्यातर्फे रंगरंगोटीही करण्यात आली, असे काब्राल यांनी स्पष्ट केले.