वास्को, गोवा शिपयार्डसमोरील रम्बलर्स हटविण्यात यावेत, अशी मागणी येथील स्थानिकांनी केली आहे. येथील कित्येक घरांना या रम्बलर्समुळे तडे गेल्याचे स्थानिकांनी सांगितले.

येथील गोवा शिपयार्डसमोर वाहनांचा वेग कमी करण्यासाठी रम्बलर्स घातले आहेत. जरी हे रम्बलर्स घातले असले तरी चारचाकी वाहने यावरून वेगाने जातात. तसेच बस, ट्रक, टँकर अशी अवजड वाहने जाताना या रम्बलर्समुळे जमिनीला कंप सुटतो, त्यामुळे येथील घरांना तडे जाण्याच्या प्रकारांत वाढ झाली आहे. तसेच दोन दिवसांपूर्वी याठिकाणी एक मोठे आंब्याचे झाड मुळापासून उन्मळून एका घरावर पडले.

यामुळे घरमालकाची मोठी वित्तहानी झाली आहे. जरी झाड पावसाच्या तडाख्यात पडले असले तरी या मुख्य रस्त्यावर घातलेल्या रम्बलर्समुळे त्याला मार बसल्याचे स्थानिकांचे म्हणणे आहे.

दरम्यान, या रम्बलर्समुळे या मुख्य रस्त्याच्या दोन्ही बाजूला असलेल्या घरांनाही कंप सुटतो व यामुळे घरांना तडे जात असल्याचे नागरिकांनी सांगितले. तसेच घरातील जमीनही खचत असल्याचे सांगितले. त्यामुळे घरांना व लोकांना यापासून धोका निर्माण झाला आहे.

मोठा गतिरोधक उभारा!

हा प्रकार वास्कोचे आमदार कृष्णा साळकर तसेच माजी नगराध्यक्ष तथा स्थानिक माजी नगरसेवक नंदादीप राऊत यांच्या कानावर घातला. त्यानंतर राऊत यांनी या ठीकाणी येऊन पाहणी केली. हे रम्बलर्स काढून त्या ठिकाणी मोठा गतिरोधक बसवण्यात यावा, अशी मागणी येथील स्थानिकांनी केली आहे. आपण त्यासाठी प्रयत्न करू, असे आश्वासन माजी नगराध्यक्ष नंदादीप राऊत यांनी दिले.