Goa News : सासष्टी, काणकोणातील आमोणे, पैंगीण येथील आदर्शग्रामात आदर्श युवा संघातर्फे २३ वा लोकोत्सव ८ डिसेंबरपासून तीन दिवस भरवण्यात येणार आहे.

या लोकोत्सवाच्या जागृतीसाठी सभापती रमेश तवडकर यांनी सुरवात केली असून शुक्रवारी मडगाव येथील रवींद्र भवनात फातोर्डा व मडगावातील लोकांसाठी जागृती कार्यक्रम घडवून आणला.

यावेळी नगराध्यक्ष दामोदर शिरोडकर, माजी आमदार दामोदर नाईक, जिल्हा परिषद सदस्य परेश नाईक, नगरसेवक, भाजपचे पदाधिकारी व कार्यकर्त्यांचा शाल, श्रीफळ व मानचिन्ह देऊन सन्मान करण्यात आला.

या प्रसंगी तवडकर यांनी सांगितले की, गोव्याची खरी श्रीमंती संस्कृती, खाद्य पदार्थ व औषधात आहे. हीच श्रीमंती देश व जगापुढे आणणे गरजेचे आहे. लोकोत्सवाद्वारे या श्रीमंतीचे प्रदर्शन केले जाणार असून त्यांतून गोव्याची खरी संस्कृती प्रदर्शित केली जाणार आहे.

बाहेरील राज्यात गोव्याची प्रतिमा डागाळलेली आहे, याचे कारण गोव्याची खरी माहिती दिली जात नाही.तसेच गोव्यात जे गुन्हे होतात त्यात ७० ते ७५ टक्के परराज्यातील लोकांचा हात असतो, असे ते म्हणाले. लोकोत्सव हा गोव्याच्या संस्कृतीचा ब्रॅण्ड बनलेला आहे, असे माजी आमदार दामोदर नाईक यांनी सांगितले. मुलांना या लोकोत्सवाद्वारे संस्कृती, परंपरेची जाणीव करून देणे गरजेचे असल्याचेही नाईक यांनी सांगितले.

काणकोणला सांस्कृतिक हब करणार

लोकोत्सवाद्वारे गोव्याच्या संस्कृतीचे संवर्धन होणे व काणकोणला सांस्कृतिक हब करण्याचा आपला संकल्प आहे. आदर्शग्राम केवळ लोकोत्सवापुरता नसून तो ३६५ ही दिवस खुला ठेवण्यात येईल. त्यामुळे गोव्याच्या भावी पिढीला तसेच पर्यटकांना गोव्याची खरी माहिती मिळणार आहे, असेही तवडकर यांनी सांगितले.