Ferryboat Service: राज्यात विविध ठिकाणी सुरू असलेल्या जलमार्गावरील फेरीबोट सेवा तिकीट शुल्कात वाढ करण्यात आलेली अधिसूचना मागे घेऊन जुन्याच तिकीट शुल्कासंदर्भातची अधिसूचना जारी करण्यात आली आहे.

ही सूचना बंदर कप्तान व नदी परिवहन खात्याचे संयुक्त सचिव विकास गावणेकर यांनी काढली आहे. या अधिसूचनेनुसार उद्या 16 नोव्हेंबरपासून दुचाकीस्वारांना मोफत फेरीसेवा करण्यात आली असून इतर वाहनांसाठीचे जुनेच दर कायम ठेवण्यात आले आहेत.

पोंबुर्फा - चोडण, जुने गोवे - पिएदाद, कामुर्ली - तुये, नार्वे - दिवाडी, कुंभारजुवे - गवंडाळी या जलमार्गावरील फेरीसेवेसाठी तीनचाकी व चारचाकी वाहनांसाठी प्रत्येक फेरीसाठी ७ रुपये शुल्क, तर प्रतिमाह ३१५ रुपये पास ठेवण्यात आला आहे.

मध्यम व्यावसायिक व प्रवासी वाहनांसाठी प्रत्येक फेरीसाठी ७ रुपये, १० टनाखालील अवजड वाहनांसाठी प्रत्येक फेरीसाठी 20 रुपये, तर मालवाहू वाहनांसाठी २० रुपये प्रति टन असे शुल्क ठरवण्यात आले आहे. पास असलेल्या वाहनधारकांना अमर्यादित सेवेचा लाभ घेता येणार आहे.

वळवई - सुर्ला - मायणा, पणजी - बेती, तोलतो - धावजी, केरी - तेरेखोल, रायबंदर - चोडण, सांपेद्र - दिवाडी, वाशी - अंबोई, सारमानस - टोंक, राय - शिरोडा व आडपई - रासई या जलमार्गावरील फेरीसेवेसाठी तीनचाकी व चारचाकी वाहनांसाठी प्रत्येक फेरीसाठी १० रुपये शुल्क, तर प्रतिमाह 450 रुपये पास ठरवण्यात आला आहे.

मध्यम व्यावसायिक व प्रवासी वाहनांसाठी प्रत्येक फेरीसाठी 20 रुपये, 10 टनाखालील अवजड वाहनांसाठी 22 रुपये, तर मालवाहू वाहनांसाठी 20 रुपये प्रत्येक टनामागे शुल्क आकारले जाणार आहे. रासई - दुर्भाट या जलमार्गावरील फेरीबोट सेवेसाठी तीनचाकी व चारचाकी वाहनांसाठी प्रत्येक फेरीसाठी 14 रुपये व प्रतिमाह 650 रुपये पास शुल्क ठेवण्यात आले आहे.

मध्यम व्यावसायिक व प्रवासी वाहनांसाठी प्रत्येक फेरीसाठी 20 रुपये, 10 टनाखालील अवजड वाहनांसाठी 33 रुपये, तर मालवाहू वाहनांसाठी प्रत्येक टनामागे 20 रुपये शुल्क आकारण्यात येणार आहे. मडकई - कुठ्ठाळी जलमार्गावरील फेरीबोट सेवेसाठी तीनचाकी व चारचाकी वाहनांसाठी प्रत्येक फेरीसाठी 27 रुपये व प्रतिमाह 1215 रुपये पास शुल्क ठेवण्यात आले आहे. मध्यम व्यावसायिक व प्रवासी वाहनांसाठी प्रत्येक फेरीसाठी 43 रुपये, 10 टनाखालील अवजड वाहनांना तसेच मालवाहू वाहनांना या फेरीबोटीचा वापर करता येणार नाही.