Indian Super League: इंडियन सुपर लीग (आयएसएल) फुटबॉल स्पर्धेतील हैदराबाद एफसीची निराशाजनक कामगिरी पाहता शुक्रवारी (ता. 5) फातोर्डा येथे होणाऱ्या सामन्यात एफसी गोवास विजयाच्या पूर्ण तीन गुणांची नामी संधी आहे, तरीही यजमान संघाचे प्रशिक्षक मानोलो मार्केझ प्रतिस्पर्ध्यांना कमी लेखण्यास तयार नाहीत.

दरम्यान, एफसी गोवा सध्या 19 सामन्यांतून 36 गुण मिळवून गुणतक्त्यात चौथ्या स्थानी आहे. त्यांना लीग शिल्ड जिंकण्याची खूपच कमी संधी आहे. बाकी तिन्ही सामने जिंकणे त्यांच्यासाठी अत्यावश्यक आहे. तुलनेत हैदराबाद एफसीविरुद्धचा शुक्रवारचा सामना सोपा आहे, मात्र 9 एप्रिल रोजी जमशेदपूर एफसीविरुद्ध (अवे मैदानावर), तर 14 एप्रिल रोजी चेन्नईयीन एफसीविरुद्ध (होम मैदानावर) एफसी गोवा संघर्ष करताना दिसेल.

अशा परिस्थिती फातोर्ड्यात शुक्रवारी पूर्ण तीन गुण प्राप्त करुन एफसी गोवा गुणतक्त्यात प्रत्येकी 39 गुण असलेल्या ओडिशा एफसी आणि मोहन बागानला गाठण्यासाठी प्रयत्नशील असेल. सध्या मुंबई सिटी 44 गुणांसह अग्रस्थानी आहे. थांगबोई सिंगटो यांच्या मार्गदर्शनाखालील हैदराबाद एफसीला 20 पैकी 14 सामन्यांत पराभव पत्करावा लागला आहे. अवघ्या आठ गुणांसह ते शेवटच्या बाराव्या क्रमांकावर आहेत. एकमेव विजय त्यांनी चेन्नईयीन एफसीविरुद्ध नोंदवला.