पणजी: भारताचा गौरव वाढवणाऱ्या ब्रँडना प्रोत्साहन देण्यासाठी तसेच जागतिक पातळीवर त्याच्या प्रदर्शनासाठी व्यासपीठ उपलब्ध करण्यासाठी पर्यटन व कौशल्य मंत्रालयाच्या सहकार्याने पार्कोजतर्फे दोन दिवशीय ‘द लक्झरी’ परिषदेचे आयोजन करण्यात आले आहे. ही परिषद 26 व 27 रोजी हिल्टन रिसॉर्ट येथे होणार असून त्याचे उद्‍घाटन केंद्रीय सांस्कृतिक व विदेशी व्यवहार मंत्री मीनाक्षी लेखी यांच्या हस्ते होणार आहे. ‘द लक्झरी’ लीगच्या संस्थापिका रितू बेरी म्हणाल्या, 26 रोजी या परिषदेचे संध्याकाळी 5 वा. उद्‍घाटन होणार आहे.

सांस्कृतिक वारसा ब्रँडिंगसाठी या परिषदद्वारे व्यासपीठ करण्यात देण्यात येत आहे. भारती कला, कारागिरीला अधिक प्रोत्साहन देण्यात येणार असून समविचारी लोक, जागतिक विचारवंत व सरकार यांच्यात संवादाच्या माध्यमातून वैचारिक देवाण - घेवाण करण्याचा या परिषदेमागे उद्देश असल्याचे त्या म्हणाल्या.

यंदाच्या या परिषदेच्या उपक्रमात सौंदर्य, वस्त्रप्रावरणे, असेसरीज व विविध क्षेत्रातील जागतिक पातळीवरील ब्रँड सहभागी होत आहेत. या उपक्रमाला केंद्रीय पर्यटन मंत्रालय व केंद्रीय कौशल्य विकास व उद्योजकता यांचेही सहकार्य लाभले आहे, अशी त्यांनी माहिती दिली. खादी हे फेब्रिक लक्झरी असून देशातील हातमागाचे कापड आहे. ते देशाचे राष्ट्रीय फेब्रिक आहे. द लक्झरीचा अर्थ विविध कला व उद्योजकतामध्ये असलेली बुद्धिमत्ता व कौशल्य असून तो लोकांपर्यंत पोहचवण्याचा प्रयत्न आहे. जागतिक पातळीवर बदलते आयाम, नवी परिभाषा, पुनर्कल्पना यावर चर्चा व संवाद या दोन दिवशीय परिषदेत केला.