येथील दक्षिण गोवा जिल्हा इस्पितळ इमारतीत खासगी वैद्यकीय महाविद्यालय सुरू करण्यास गोवा फॉरवर्ड पक्षाने विरोध केला आहे. येथे खासगी महाविद्यालय सुरू केल्यास किंवा या इस्पितळाचे खासगीकरण केल्यास गोवा फॉरवर्ड त्याला कडाडून विरोध करेल, असा इशारा या पक्षाचे अध्यक्ष विजय सरदेसाई यांनी दिला आहे.

मडगाव आणि फोंडा येथील इस्पितळात असलेल्या त्रुटीबद्दल सरदेसाई यांनी राज्याच्या मुख्य सचिवांना एक सविस्तर पत्र लिहिले असून ही दोन्ही इस्पितळे खासगी संस्थेच्या हातात देण्याऐवजी या दोन्ही इस्पितळाचा कारभार सुधारण्यासाठी एक कृती दल स्थापन करून लोकांना येथे कशा चांगल्या सुविधा आणि उपचार देता येतील, याकडे लक्ष द्यावे, अशी मागणी त्यांनी केली आहे.

सरदेसाई यांनी नुकत्याच संपलेल्या विधानसभा अधिवेशनात या दोन्ही इस्पितळातील सुविधांवर चर्चा केली होती.

दक्षिण गोवा जिल्हा इस्पितळाचे वरचे दोन मजले विनावापर पडून आहेत. या दोन्ही मजल्यांचा इस्पितळासाठीच वापर करून हे 500 खाटांचे परिपूर्ण इस्पितळ करावे. इस्पितळात पुरेशा वैद्यकीय सुविधा उपलब्ध कराव्या, असेही ते म्हणाले.

फोंड्यात सुविधा वाढवा

फोंडा येथील इस्पितळात आणखी एक रेडिओलॉजिस्ट, नेत्र तपासणी ओपीडी, परिपूर्ण अशी रक्तपेढी, सिटी स्कॅन सुविधा, न्यूरोलॉजिस्ट आणि तातडीने एक्स रे ऑपरेटर नेमण्याची गरज त्यांनी व्यक्त केली.

मधुमेह रुग्ण आणि ह्रदय शस्त्रक्रिया केलेल्या रुग्णांसाठी औषधे उपलब्ध करण्याची गरज या पत्रात व्यक्त केली आहे. मुख्य सचिव या मागण्यांवर गंभीरतेने विचार करून योग्य ते निर्णय घेतील, अशी अपेक्षा त्यांनी व्यक्त केली आहे.