Goa Crime News: ‘हरमल येथे आयोजित करण्यात आलेल्या नाईट कॅम्पवेळी एका ६ वर्षीय मुलीचे लैंगिक शोषण करणारा रशियन नागरिक इलिया वासुले याला भाडेपट्टीवर राहण्यास दिले होते त्या घरमालकाची चौकशी करण्यात येणार आहे.

या कॅम्पवेळी उपस्थित असलेल्या मुलांच्या जबान्या नोंदवण्यात येत आहेत. संशयिताविरुद्ध ‘एफआरआरओ’ विभागाकडून लुकआऊट नोटीस जारी केली जाईल, अशी माहिती वरिष्ठ पोलिस अधिकाऱ्याने दिली.

भाडेपट्टीवर खोली किंवा फ्लॅट देणाऱ्या मालकाने भाडेधारकाची माहिती सी फॉर्म भरून जवळच्या पोलिस स्थानकात देणे सक्तीचे आहे. याप्रकरणातील संशयिताला भाड्याने फ्लॅट दिलेल्या मालकाने माहिती दिली नसल्यास त्याच्यावरही कारवाई केली जाईल.

हा नाईट कॅम्प मुलांसाठीच होता व तेथे त्यांचे पालक नव्हते. हा कॅम्प 15 दिवसांपूर्वी झाला होता. मुलीच्या आईने या घटनेची तक्रार दाखल करण्यासाठी मांद्रे पोलिस स्थानक गाठले होते. मात्र, तेथील पोलिसांनी त्यांची तक्रार दाखल करून न घेता त्यांना पणजी महिला पोलिसांत जाण्यास सांगितले. त्यामुळे तक्रारीस उशीर झाला.

दरम्यानच्या काळात संशयित रशियात गेल्याची माहिती समोर येत आहे. भारतातून तो गेला असल्यास त्याला चौकशीसाठी गोव्यात आणण्यासाठी देशाच्या गृह मंत्रालयाच्या मदतीने रशियाच्या सरकारशी संपर्क व्यवहार करण्याची गरज भासणार आहे, असे या अधिकाऱ्याने सांगितले.