Goa Accident: शिरसई येथे स्वयंअपघातानंतर चारचाकीत अडकून पडलेल्या जखमी चालकास अग्निशमन दलाचे जवान तसेच पोलिसांनी अर्ध्या तासाच्या प्रयत्नांनंतर गाडीतून बाहेर काढले. या अपघातात वाहनचालक गंभीर जखमी झाला असून तो म्हापसा फायर स्टेशनचा कर्मचारी आहे. या अपघातात गाडीच्या दर्शनी भागाचा चक्काचूर झाला.

प्राप्त माहितीनुसार, प्रकाश घाडी (42) असे या जखमी वाहनचालकाचे नाव आहे. गुरुवारी (ता.9) दुपारी 12 वा.च्या सुमारास हा अपघात घडला. घाडी जीए 04 सी 4658 या ओम्नी गाडीतून जात असताना, अचानकपणे त्यांचा डोळा लागल्याने हा अपघात घडल्याचे बोलले जाते. ते ऑन ड्युटीवर नव्हते.

शिरसई पंचायतजवळील रस्त्याशेजारील एका झाडाला प्रकाश यांच्या गाडीची जोरदार धडक बसली. सुदैवाने जीवितहानी झाली नाही. मात्र, या अपघाताची तीव्रता जास्त असल्याने ते काही वेळ गाडीतच अडकून पडले.

या घटनेची माहिती मिळताच म्हापसा अग्निशमन तसेच कोलवाळ पोलिसांनी घटनास्थळी धाव घेत स्थानिकांच्या मदतीने त्यांना गाडीतून बाहेर काढले. त्यांच्या पायाला गंभीर दुखापत झाली आहे.