राज्यात अपघातांचे सत्र सुरुच आहे. रस्ता अपघातात मृत्यू होण्याचे प्रमाण दिवसेंदिवस वाढतच आहेत. गत साडेचार महिन्यांत राज्यातील अपघातांचे प्रमाण गेल्यावर्षीपेक्षा घटले असले तरी मृत्यूचे प्रमाण 50 टक्क्यांनी वाढले आहे.

मापा-पंचवाडी येथे चालकाचा ताबा सुटल्याने कारचा अपघात घडला आहे. या अपघातात दोघांचा मृत्यु झाला असून 5 जखमींना गोमेकॉत दाखल करण्यात आले आहे.

याबाबत अधिक माहिती अशी की, कारमधून एक कुटुंब रिवण येथे घरी जात होते. यावेळी मापा-पंचवाडी येथे आले असता चालकाचा कारवरील ताबा सुटल्याने रस्त्याच्या कडेला असलेल्या झाडाला कार धडकली.

या धडकेत 15 वर्षीय युवकाचा जागीच मृत्यु झाला तर अपघातात गंभीर जखमी झालेल्या 18 वर्षीय युवतीचा उपचार सुरु असताना मृत्यु झाला. इतर 5 जखमींना उपचारासाठी गोमेकॉत दाखल करण्यात आले आहे.

असाच एक भीषण अपघात सकाळी सांकवाळ कुठ्ठाळी येथे दोन कारमध्ये झाला. यात तीनजण जखमी झाले आहेत. धक्कादायक बाब म्हणजे ड्रायव्हरची झोप लागल्याने हा अपघात झाला अशी माहिती मिळत आहे.

दिलासादायक बाब म्हणजे एका कारमध्ये एक वर्षाचे बाळ होत मात्र, सुदैवाने या अपघातात बाळाला कोणतीही जखम झाली नसून, ते सुखरूप आहे. अपघातात दोन्ही कारचे मोठ्या प्रमाणावर नुकसान झाले आहे.