Goa News: एरवी माणसा-माणसांत भांडण, मारामारी झाली की हमखास पोलिसांत तक्रार केली जाते; पण एखाद्या मांजरीला मारल्याची तक्रार अभावानेच होते. प्रत्यक्षात फोंडा येथे मांजरीला मारल्याची तक्रार सुनेने सासूविरुद्ध केली आहे.

सिल्वानगर येथील एका घरात पर्शियन जातीच्या मांजरीला जखमी केल्याची तक्रार आल्फिया रेगो या सुनेने सासू रोजी रेगो यांच्याविरुद्ध फोंडा पोलिसांत मंगळवारी केली. ५ रोजी दुपारी १२ वाजता रोजी यांनी मांजरीच्या डोक्यावर अवजड वस्तू फेकून मारल्याने ती जबर जखमी झाली.

मांजरीच्या डोक्यासह चेहऱ्यावरही जखमा झाल्या असून रोजी यांची सून आल्फिया हिने याप्रकरणी पोलिसांत तक्रार दाखल केली. फोंडा पोलिसांनी ही तक्रार दाखल करून घेतली असून संशयित रोजी रेगो यांच्याविरुद्ध मांजरीला अमानुषपणे मारल्याचा गुन्हा दाखल केला आहे.