गोवा विधानसभा निवडणुकीपूर्वी, पंतप्रधान नरेंद्र मोदी आज गोव्यात म्हापसा येथे दाखल झाले. याठिकाणी त्यांनी एक भव्य सभेला संबोधित केले. यापूर्वी गोवा भारतीय जनता पक्षाने (भाजप) जारी केलेल्या प्रसिद्धीपत्रक जाहीर केले आहे. आज पंतप्रधान मोदी काय बोलणार याकडे सर्वांचे लक्ष वेधले होते. नरेंद्र मोदी (Narendra Modi) हे आज म्हापसा (Mapusa) येथे सायंकाळी 5 वाजता दाखल होणार होते मात्र त्यांना याठिकाणी पोहचायला दोन तास उशिर झाला.

दरम्यान, पंतप्रधान नरेंद्र मोदींनी गोवा विधानसभा निवडणुकीसाठी म्हापशात जाहीर सभा घेतली. या सभेत त्यांनी काँग्रेसवर घणाघाती टीका केली आहे. म्हापशातील प्रसिद्ध देवस्थान बोडगेश्वराचे दर्शन घेतल्यानंतर पंतप्रधान मोदींनी आपल्या जाहीर सभेला सुरुवात केली. यावेळी बोलताना ते म्हणाले की, 14 फेब्रुवारीला गोव्यात पुन्हा एकदा एकेक मतदार कमळ फुलवण्यासाठी मतदान करणार आहे. त्यासाठी मी भाजपच्या सर्व उमेदवारांना भव्य विजयाच्या शुभेच्छा देतो आहे. मला नेहमी माझे मित्र मनोहर पर्रीकरांची उणीव भासते, तुम्हाला गोवेकरांनाही ती उणीव जाणवत असेल अस म्हणत त्यांनी पर्रीकरांच्या आठवणींना उजाळा दिला.

पुढे बोलताना म्हणाले की, पर्रीकरांनी येथेच माझी एक सभा आयोजित केली होती. त्यावेळी एक शब्द निघाला होता काँग्रेसमुक्त भारत, माझ्या तोंडून निघालेला हा शब्द देशभरातील कोट्यवधी लोकांचा संकल्प बनला आहे. तसेच गोवा सर्वांना सोबत घेऊन चालतोय. ज्यांना गोव्याच्या संस्कृतीची परवा नाही त्यांनी आपल्या भ्रष्टाचाराचा आणि लूटतंत्राचा एटीएम गोव्याला बनवलं होतं अस म्हणत त्यांनी कॉंग्रेसवर निशाणा साधला आहे.