Lok Sabha Election:

लोकसभा निवडणुकीच्या पार्श्‍वभूमीवर गोव्यातील विविध भागात निमलष्करी दलाच्या पोलिसांमार्फत ‘वर्चस्व फ्लॅग मार्च’ सुरू करण्यात आला आहे. शुक्रवारी हा फ्लॅग मार्च हडफडे, शिवोली तसेच कोळवाळ, पिर्ण व अस्नोडा या भागातून कढण्यात आला.

निवडणूक आचारसंहिता काळात कोणत्याही प्रकारचे अनुचित प्रकार घडू नये तसेच परिसरात कायदा व सुव्यवस्थेचा प्रश्‍न उद्‍भवू नये यासाठी या दलाच्या पोलिसांचे अशा प्रकारचे फ्लॅग मार्च अधूनमधून सुरूच राहतील, अशी माहिती उत्तर गोवा पोलिस अधीक्षक अक्षत कौशल यांनी दिली.

निवडणुकीचे बिगुल शनिवार, 16 रोजी दुपारनंतर वाजणार असून त्यानंतर राज्यात निवडणूक आचारसंहिता लागू होणार आहे. स्थानिक पोलिसांव्यतिरिक्त या निवडणुकीच्या काळात निमलष्करी

दलाच्या अतिरिक्त तुकड्या सुरक्षा व्यवस्थेवर नियंत्रण ठेवण्यासाठी मागवण्यात येणार आहेत. सध्या दोन तुकड्या गोव्यात दाखल झाल्या आहेत. प्रत्येक तुकडीमध्ये सुमारे 100 पोलिस असून प्रत्येकी दोन्ही जिल्ह्यांसाठी एक तुकडी देण्यात आली आहे.

स्थानिक पोलिसांच्या मदतीने या निमलष्करी दलाची पथके विविध परिसरात गेल्या काही दिवसांपासून दिवसा व रात्री फेऱ्या मारू लागली आहेत. धार्मिक स्थळांच्या ठिकाणी कोणत्याही दंगलीचे प्रकार होऊ नयेत व एकप्रकारे निवडणूक काळात अनुचित घटनांवर नियंत्रण ठेवण्यासाठी हे वर्चस्व फ्लॅग मार्च करण्यात येतो, अशी माहिती पोलिस सूत्रांनी दिली.