मोरजी : मुख्यमंत्री डॉक्टर प्रमोद सावंत हे मांद्रे मतदार संघात येऊन अर्ध्या माहितीच्या आधारे आमच्यावर टीका करण्यापेक्षा अगोदर आपल्या मतदार संघावर लक्ष द्यावे आणि तिथं निवडून यावे, आणि आपण जर क्रिमिनल आहे तर न्यायालय शिक्षा करणार मात्र जनतेची दिशाभूल करून अपप्रचार करू नये असे आवाहन मांद्रे मगोचे उमेदवार जित आरोलकर (Jit Arolkar) यांनी पत्रकार परिषदेत केले.

मुख्यमंत्री (CM) डॉक्टर प्रमोद सावंत 10 रोजी मांद्रे येथे भाजपच्या (BJP) कोपरा बैठकीला रात्री 9 वाजता आले होते त्यावेळी अल्प प्रतिसाद मिळालेल्या सभेत बोलताना आपल्यावर आपण क्रिमिनल असून बेल वर बाहेर असल्याचे सांगत सुटले आहे, त्याला प्रत्युत्तर देण्यासाठी पत्रकार परिषद आयोजित केली होती त्यावेळी ते बोलत होते.

10 हजार नोकऱ्यांचं काय झालं

मुख्यमंत्री डॉक्टर प्रमोद सावंत यांना आपला आणि पक्षाचा पराभव दिसत असल्याने ते वैफल्यग्रस्त झाले आहेत. शिवाय मांद्रेत मगोचा विजय दिसत असल्याने ते मांद्रेत येऊन आपल्यावर टीका करतात त्यांनी टीका करण्याऐवजी निवडणुका (Election) पूर्वी जे 10 हजार नोकऱ्या देण्याचे आश्वासन दिले होते, त्यांचे काय झाले?असा सवाल करून, गोमंतकीय बेरोजगार यंदाच्या निवडणुकीत मताद्वारे उत्तर देतील असा दावा जित आरोलकर यांनी केला.

मुख्यमंत्री डॉक्टर सावंत यांनी अगोदर आपल्यावर ज्या केसेस आहे त्याची पूर्ण माहिती मिळवावी व नंतरच आपल्यावर टीका करावी असे आवाहन केले.आपल्यावर ज्या केसेस आहे त्याची मुख्यमंत्री सावंत यांनी चौकशी करावी,असे आवाहन जित आरोलकर यांनी केले.